教育
中文系畢業的同學很多都會從事教育，大部分人都會在日校工作，亦有一部分人投身補習界，成為補習天王，或是補習天王旗下的助教。若同學能夠成功成為教師（GM）的話，人工一般比其他系畢業生高。不過好多時，你要入職就做到GM，你要在畢業之後讀多張教育文憑。正如另一篇提過，報教育文憑競爭很大，所以會有一班同學畢業之後因為冇教育文憑而被壓價，而且可能要由教學助理、助理教師、副教師等輔助教師的title做起，所以人工一定冇GM咁好，而且待遇亦較差。例如有d 副教師的黑字假期（即非紅日的學校假期，包括暑假）只能放一半，或冇得放
這是現在的情況。幾年之後呢？我地睇睇小學的數字：
(圖CAP自教育局公開資料)
小學學生人數由2015開始，一路升到2019，睇落去幾好景。但是，過往表現並不反映將來表現，這人數的升幅很大程度是因為雙非的問題。維基資料顯示，在2013年每三名適齡入讀幼稚園的學童便有一名是雙非。不過，政府2012年以行政手段叫停雙非，雙非嬰兒數目大幅下降，由2011年高峰時的35736人，大減到2013年的730人。[數字from維基]換句話講，當呢水雙非入學之後，小學既學生人數會大幅下降 (超過20%) [2011年出世個班2017年入讀小一；2013年打後只有極少數是雙非，所以在2019年小一入學人數會大跌]。加上龍年效應 [中國人迷信，有鋪癮鍾意在龍年生子......]，2012年是龍年，龍B多在2018/19或2019/20年入讀小一，此後的學生人數會下降。大家都知2020疫情開始嚴重，內地生減少到港上學，往日日日來回過關的跨境學童數量亦減了不少。此外，本地的一些辦學團體及內地辦學機構亦開設「港人子弟學校」（如培僑在深圳龍華開了一間），教授本港課程。這吸納了很多內地生及雙非。又，本地政治變化，使不少香港人決定移民，不少學生均隨家人移居海外。由此可知，2020/21以後的學生人數當會大幅減少。個別小學已面臨殺校（如黃大仙獻主會溥仁小學）
人工待遇方面，政府已推行「教師學位化」，取消了文憑教師職系，現在助理小學學位教師（APSM）的起薪與中學學位教師（GM）的起薪一樣。
教師數量在20-21學年到了頂峰，而隨著學生人數減少，部分學校或須縮班，有一定數量的教師將成超額教師。當然亦有教師移民，數量亦不少。最近幾年，有關當局亦從師訓名額著手，PT PGDE的學位變得更難申請。有未接受師訓的老師接連報了好幾年，依然未獲取錄。
睇完小學，我地睇下中學的數字：
上圖反映：總學生人數亦有下降（跌幅有2.9%）。
學生人數下降，但教師數量反而上升。中學教師總人數上升了2.3%。師生比例較低，較低機會再降低。睇到呢度，你可能會問小學班留港雙非過三、四年之後都係會入中學，中學既人數式或可見上升。呢個係事實，不過去到2023/24 學年之後，小學班雙非已經上晒中學，學生人數到時會再下跌。雖然政府到時又可能重施故技，好似2012年咁開始2—1—1減派，但老實講個師生比例咁低佢可以減到幾多次呢？個別中學開始合併，未來學生人數一定下跌，而教師會過剩。
admin的意見：如果想入行，快手喇。上了岸，儲經驗，儲年資，早點Perm，到時就可以安安穩穩。
研究
「學而優則研」？有唔少讀書讀得好的同學會選擇呢條路。做全日制研究生有咩好呢？
時間相對自由，學校雖要求你一星期要當值五個半日，但除了有特定工作要做之外，你是否當值，或是在哪裡當值，學校根本不理你。因此，除了有特定工作、挑科與上課之外，其餘時間可以自行支配（自行支配不等於你就可以無所事事，下文會再說）。除此之外，做研究生會得到大學每月提供的助學金，按2022/23學年的數額，每月為$17600(博士生考完資格試，$18100)。這筆助學金不須報稅，數額雖然不是很多，但應能保障你日常生活的基本需要。（不過你不能兼職，若要兼職須先申請，每年上限九十九小時）此外，從2018/19學年起，全日制研究生在常規學年內不用交學費，咁變左每年少左筆四萬二千一的支出。作為全日制學生，你還可以享有不同的學生優惠，例如二十五歲以下的同學坐地鐵可以半價等。（以上一段不適用於兼讀制學生）
望落好似好吸引，但其實唔容易。唔容易可以從三方面去講，一則唔易考入去，二則忙到七彩，三則唔易準時畢業。
唔易考入去。先講MPhil。學部對學生的學術水平有一定的要求，你申請入讀時便交研究計劃一篇（5000字以內）、學術代表作一篇及自述（1000字以內）。聽說研究計劃跟代表作佔重一樣，所以本科時的那篇048就要見得下人。然後就是要想個有點學術水平的題目，然後在研究價值、研究方法、文獻回顧、研究範圍、研究背景等方面洋洋灑灑寫五千字出黎。（考博士，研究計劃八千字，加碩文一篇）。因為學部係要出糧比你（而唔係淨係收你學費），所以學位有限，而且也盡可能要在四個範疇之間平均分配。以下是16/17及17/18學年的收生資料：
全日制PhD
|
兼讀制PhD
|
全日制MPhil
|
兼讀制MPhil
|
|
2016/17學年入學
|
6
|
2
|
8
|
2
|
2017/18學年入學
|
7
|
1
|
11
|
2
|
數目不是很多，而你要知道，這其中一部分並非本地學生。
全日制
|
本地生（PhD/MPhil）
|
內地生（PhD/MPhil）
|
2016/17學年入學
|
3/6
|
3/2
|
2017/18學年入學
|
5/8
|
2/3
|
案2017/18學年入學的其中兩位內地生是在中大讀本科的。
學位少，要求高，要考得入並唔係一件容易的事。我見過有人考左3年都考唔入。
忙到七彩。表面上你有好多時間可以自己支配，但其實每個同學都像在跑一樣。研究生上堂，程度比本科的課程都要深入，而課業的要求，也比本科重不少。（中文系本科課業重是有名的了）基本盤：一個present加一篇paper。有這樣輕鬆的安排，只是極少數。有不少的科，大約每兩三星期便要交千幾字至幾千字不等。寫不是問題，但你要能寫，便要先看、先讀。本科時覺得一個星期要睇一本幾百頁的readings好辛苦，去到研究院時你要讀的遠不只這個數目。還要present呢？還有期末論文呢？老師們希望你寫出來的期末論文是一篇可以預備發表的論文，因此八千字是基本，也有的要求寫一萬五千。仲有講論會呢？有d教授仲會開講習會呢？chur不起的同學，要考研前三思。（話又說回來，雖然chur，但好fruitful，會學到好多野）（兼讀的同學更慘慘豬）
日常課業以外，研究生也要當助教。標準配置：每年一科，少數助教「蒙上恩寵」，多教一科半科也是有可能的。助教的工作量可輕可重，看你跟什麼老師合作，但基本上班上行政的工作是做定了。有導修的要見學生，有mid-term的要出要改，有paper的要回答同學的查詢，如此種種，佔據了助教不少時間。此外，系方安排的其他工作，包括課檢、監考、搞會、校對、出版、資訊日，都要助教做，數量大概每樣每個學期一兩次，雖然每樣都佔不了多少時間，但積少成多。（系方盡量不會安排應屆畢業的搞會、校對、出版，讓他們好好寫文。不過事情還得有人做，你未畢業個年會有衝動block左某個以3943開頭的號碼）
唔易準時畢業。全日制MPhil常規修業年期係兩年。但其實你開左學就唔係好洗再寫文，因為你要上既堂已經會令你應接不暇，加上其他種種事務，基本上你唔會有咩時間。能做事的就係sem break、假期，如果唔好好把握咁就基本篤定要defer。（亦有聽聞個別教授會唔比學生畢業，原因係學術水平未到。至於邊個教授？會昇龍拳的那個。不知我說什麼的，自行查找蘋果動新聞）
PhD亦chur。除左要考資格試，做原典報告之外，三年要寫三篇講論會，只會更忙。
可是，那然後呢？讀完又點？
如果你三個學位都在中大／香港讀，想做教授？冇得做，做到老，最多比個高級講師你做。仲要睇有冇位，冇位就去做part-time先。劉桂標事件我諗大家都有所聞，兼任講師有咩唔好大家應該都知。去外國浸下鹹水番黎又係唔係好好景？唔係。近期系又巧立名目地開左d位名為RAP，姐係齋寫文的教授，但最後又叫左人地去教書。RAP唔係想像中咁好做，待遇同助理教授個d都有分別。唔好唔記得，大學只係中學、小學的進化版，一樣係識巧立名目將同工不同酬合理化。咁去第二間做咪得lor？Sorry，天下的烏鴉一樣黑。你又可能會諗，咁去私立大學度做，又或者去教副學士個d 咪得。個人認為，呢堆學校能唔能夠sustain落去其實都係問題。另外，做博士後亦都唔係好好景。
咁做其他喇，又得唔得？OK，讀MPhil出來，碩士普及嘛，對找工作是有幫助的。但如果你想教書，教育文憑有用過你考餐懵讀餐懵既mphil。至於讀完PhD出黎搵其他野做係個困局。讀完PhD的你，有著PhD的驕傲，低的不願做。可是，找高的，人家可能不請你，或根本請不起你。所以，年輕人，路不好走。（話說回來，又有邊條路係好走架呢？）
admin的意見：唔好對研究呢條路有過分浪漫的幻想。唔chur得的，切勿報名。
傳媒
有同學做記者，有同學做編輯，亦有同學做網媒。紙媒不好做，因為公司好多時都在燒錢，而且有點辛苦。有個朋友做記者，成日跑新聞（但唔瘦），做到最後連間公司都執埋。亦有同學做獨立記者，辛苦呀。至於網媒嘛，有d難聽D咪叫content farm囉，自得其樂，覺得有意義咪得囉。
政府
識得有幾個做左政府，其中一部分係督察。一入職五萬幾人工冠絕全部同學，佢地鍾意喇。亦有同學走去考AO/EO/ATO個d，admin 留意到有一位同學走去做左貿易主任職系，初入職做二級助理貿易主任，近排走去查下政府電話簿，已經升左做貿易主任，前途無可限量。
其他
識得有人開公司搞文化導賞，有人開關注組關注下d小食。
