提提你

「就算失望不能絕望」,願中大人共勉!

【01. 搵銀攻略】
【02. 投考政府工資訊目錄】
【03. 科目資訊平臺】

2020年8月2日星期日

學識玩信用卡:信用卡新手攻略

入到大學,好多同學都已經十八歲,可以申請信用卡。不過,好多同學對信用卡都好好奇,但又冇咩人會同大家做分享。另外,有d 父母可能都會同你講叫你唔好用。咁到底玩唔玩信用卡好?要玩信用卡又要點樣玩呢?

一、點解要用信用卡?
用信用卡通常會有三個目的:
1:賺回贈。回贈可以係現金回贈、飛行里數,亦都可以係禮物禮券。
2:拎優惠。信用卡公司會同唔同商戶合作,提供優惠。就例如大家成日去超級市場都可以見到,成日買滿$500就減$50,便利店$30 減$10。
3:遲d找數。你碌左卡之後,唔係即時要找數。你要找數的時間通常係出左statement之後的若干時間。

二、點樣可以完成迎新獎賞的要求?
申請信用卡,信用卡公司一般都會給全新客戶(之前未有佢公司信用卡的客戶)提供迎新獎賞。迎新獎賞一般都唔係白白送比你,而係要求你在卡批核之後的六十日內/九十日內/若干時間(間間唔同,自己睇條款)內簽滿若干數額,就可以得到迎新獎賞。迎新獎賞可以係現金回贈、飛行里數或姐係禮物。admin 玩信用卡玩左咁多年,迎新的現金回贈金額一般都係$300-$900 不等,禮物就收過旅行喼、超市券一堆。

東亞學生信用卡簽$2000回$250:https://cuhkinfo.page.link/bea

睇到呢到,你可以會想走:我平時好少洗錢,咁一定fulfill唔到個迎新獎賞要求喇!
咁其實又未必,只要你有技巧地玩,整夠數就易過借火。一般有以下幾個方法,做之前一定要睇清楚條款,有唔明就唔好怕醜,打上CS問。

1. 八達通自動增值。有d 信用卡公司會叫你申請信用卡時,順手link埋張八達通做自動增值。咁你就可以做埋,因為例如安信個d 都會接受八達通自動增值的交易作為符合迎新要求的交易。你可能會問,我八達通都用得唔多,咁都冇可能增值到咁多次,冇用喇。但admin 提提你,你個世界仲有個app 叫O!e pay。你可以每日轉$250 / $500 入個app, 等第時拎番出黎用,又或者轉數快(FPS)轉走,每個月有$3000免手續費轉走的QUOTA.

2. 交電話費/寬頻費。去電話公司/寬頻公司的網頁一般都可以直接用信用卡交電話費/寬頻費。以CMHK為例,你可以用佢網頁或APP交。香港寬頻可以上網交,可以預繳,亦可以落門市自己用自助機交任何金額(可實卡拍卡/Google pay/Apple pay)。

3. 通過AlipayHK (支付寶;中資) / Wechat Pay (微信支付;中資) 綁定信用卡交其他雜費,就例如係電費、煤氣費及水費。水費你可以用AlipayHK app scan 個QR code,輸入任何金額,亦可預繳。亦有個別信用卡接受使用此二寶P2P轉帳以符合迎新要求,不過好少。(例如中信)

4. Payme 轉帳。Citibank 卡可以,每月上限$1000。

5. 如果你做過晒以上幾項都仲未完成到個目標,你可以去超級市場買禮券(留意唔係間間信用卡公司接受),亦都可以上郵局網站買郵票。

** 使用網上銀行繳款服務一般不會計算為符合迎新要求的簽帳。

注意事項:
1. 迎新期一般係由張卡批核個日計,而唔係由你確認新卡個日計。一般個批核日期都會印在收卡信度,如有不明白,打上CS問。

2. 迎新一般係會在你簽完之後,若干個月之後出比你。除左少數,會先出比你,如果你簽唔夠先會扣番你。

3. 如有多於一個迎新獎賞的話,你一般都要在申請新卡時已經選定,而且選定後不能再改。所以你要選時,小心選擇。

4. 如你選收禮物的話,信用卡公司有機會會出信叫你去某d禮物中心拎。禮物中心一般要排隊,而且有一定的服務時間。如不想煩,建議都係選現金回贈。

東亞學生信用卡簽$2000回$250:https://cuhkinfo.page.link/bea

三、點樣賺回贈?
1. 八達通自動增值。一般都能夠拎到基本回贈,但注意個別信用卡公司會有唔同的回贈率。如大新One + 只有0.5%,安信有2%。

2. 真消費。你拎住張信用卡,或將卡加入Google Pay /Apple pay 等到零售商戶作正常的簽帳。

3. 網上消費。個別信用卡公司提供較好的回贈比率,如HSBC red有4%。不過要留意,交易時用咩貨幣比,有機會涉及外幣兌換或其他手續費。個別信用卡公司亦不回贈境外的交易。

4. 繳費
你不可以以信用卡在便利店作繳費交易。

a 使用網上銀行的繳費服務。有d有基本積分,有d冇分,有d有回贈上限。留意條款。一般用信用卡交學費就係指呢種。

b 使用第三方應用程式繳費,如前述的AlipayHK、Wechat Pay及銀聯雲閃付(中資)等。一般都有回贈,留意條款。

c 使用信用卡直接繳費。例如前述的上電話公司/寬頻公司的網站或門市繳費。一般當真消費。

d 使用信用卡作自動轉帳。回贈與否各異,留意條款。

5. 使用手機錢包轉帳,如前述的AlipayHK、Wechat Pay及Payme。回贈與否各異,留意條款。

6. 完成銀行的活動。留意宣傳及銀行的電郵。

四、點樣拎到回贈?
1. 現金回贈
一般下期帳單或在簽帳後的指定時間會自動回比你,留意條款。個別信用卡只會將現金回贈抵銷未來的簽帳,而不當還款。小心因為咁而被收手續費。

少數信用卡公司會要求你人手兌換現金回贈,而亦可能要達某門檻的現金回贈才可兌換。如渣打Simply Cash 要每儲夠$50先可以人手兌換。

2. 飛行里數
各異。有部分標榜飛行里數的信用卡會每個月自動入里數去你個飛行里數戶口。有信用卡公司要你人手兌換。有個別信用卡公司會要求你達到某個數先兌到。留意個別信用卡會就兌換成飛行里數收取手續費。

3. 積分
一般比較自由,可以選適合自己的選項。但係積分一般都會過期,要留意積分的到期日。最短如恆生的Cash Dollar.

五、咁信用卡公司賺咩?

嘩,講到又迎新又回贈,信用卡公司都係善堂,賺夠同我分享盈利?
傻喇,梗係唔係喇。信用卡公司有好幾方面的收入:
1. 逾期利息及逾期手續費
當你唔記得還卡數,信用卡就會收好貴的逾期利息及逾期手續費。信用卡的利息一般去到年利率3X%。所以要記得還全數,而唔係只係還min pay。

2. 商戶手續費
你每次用信用卡比錢,商戶都要比約2%的手續費。呢筆錢就會由收單行、信用卡機構及發卡行按某個比例分。

3. 年費
雖然而家都有唔少卡係免年費,但亦都仲有唔少係會收年費架。admin亦曾冇睇statement而被收千幾蚊年費(好彩最後waive得返)。所以大家要留意statement, 一見到要收年費就打上熱線waive。如不能waive,可以cut卡。即時cut卡就可以免交年費。

所以玩信用卡要記得找卡數同check statement,如果唔係就會比人賺返轉頭架喇。

六、點樣找卡數?

1. 網上銀行轉帳/ATM
一般要預早兩個工作天交,因為過數需時。注意一般都唔好選以信用卡扣帳找卡數,否則好大機會會當你透支/結餘轉戶,會收利息同埋手續費。(個別銀行唔洗,但唔識就唔好咁玩)

2. 繳費靈
拎你張提款卡去OK便利店部PPS終端機開個PPS戶口。開完就可以上網交,幾方便。

3. 轉數快FPS
部分銀行接受呢個方法。留意月結單背面。

4. 自動轉帳
一般比較方便,可以避免唔記得。但係大前提係你銀行戶口要夠錢,如唔夠,過唔到數,銀行會收你手續費,而你又會因為唔記得交卡數而有late charge同利息。

5. 其他
留意月結單背面,一般都可以寄票同用其他方法交,但都去到成2020年,你仲會唔會搞到咁麻煩呢?

七、點樣可以選一張自己岩用的信用卡?
信用卡唔洗多,最緊要適合你。(雖然admin有三十幾張,但其實有時管理起上黎都幾辛苦架)
1. 留意你的消費習慣,選擇適合你的卡。
例如你網購多,就要申請張網購卡;例如你成日去同friend 子re-u / gathering,咁你就申請張相關的後生仔卡。

2. 留意你想要什麼回贈。
你少去旅行,就唔好選飛行里數的卡。admin就廢時煩,一律現金回贈,折現最實際,哈哈。

3. 留意申請資格。
作為學生,你唔係張張都可以申請得到。有d係要求年薪幾十萬先可以申請得的。

八、用信用卡有咩要注意?
1. 你個card number、到期日同卡背面簽名欄旁的三個數字(CVV)都應保密,不要隨便公開。

2. 你手機有時會收到One time password,唔好亂將此password話比其他人聽。

3. 玩信用卡係要賺,而唔係要你倒蝕比佢。所以唔好過度消費,為買而買。另外借定唔借,還得到先好借。別讓自己債台高築。

4. 諗方法令自己記得交卡數。admin係個大頭蝦的人,所以通常都會schedule定過數或一碌完就轉帳交卡數。


  • 三分鐘申請 BOC Pay,享$10即時回贈。。詳情
  • 優惠資訊,盡在「優惠級」。詳情

想得到最新資訊?Like我地個page!

如有問題想問,不如直接pm「中大資訊」,覆得快好多。