時間：約30分鐘
語言：廣東話+英文
Panel：三個（Panel head: CEO；SEO + EOI）
---
了解你的Panel
CEO：Chief Executive Officer（總行政主任）編制：256個
人工：MPS 45（$112,250）-49（$129,325）
呢個人係Panel Head，做到呢個位已經係老江湖。一般會講開場白，叫你自介，問你CV上的問題。得唔得，好多時都係睇呢個。呢個人一般已經五十幾歲，你可以代入佢個年齡，諗下咩回答最合佢意。
SEO：Senior Excutive Officer（高級行政主任）編制：849個
人工：MPS 34（$70,590）-44（$105,175）
呢個人會問情境問題。情境題通常都係做EO成日遇到的問題/困難，你的應付方法work唔work，佢地一聽就知。因為可能佢地當年都一樣撞過板。應付呢個人，你既思維要比較周密，盡量唔好有咩漏洞比佢追問到。（雖然你點樣答，佢都係會搵到位質疑你。）呢個人大約四十幾歲。
EOI：Executive Officer I（一級行政主任）編制：1219個
人工：MPS 28（$55,705） -33（$70,090）
呢個人係場內最低級，一般都係三十幾歲。當你做左幾年之後，就有機會好似呢個人咁樣。呢個人一般問時事問題，同埋關係政府的架構的。問題雖然比較細，但亦係你搶印象分的關鍵位。
——
了解完你要交手的對象之後，我地就要了解下題目，全部題目係可中可英。
一、自介
自我介紹是一定要有的。因此，這也是你必須準備的。關於自我介紹，先前已作介紹（https://cuhkinfo.blogspot.com/2018/11/blog-post.html）你要做的就是準備一個可伸縮的自介，重點突出自己的長處與特點，而不是要把自己的CV由頭到尾同interviewer報告一次。你要highlight d 咩呢？首先關於學歷，你唔係只係報自己咩大學咩學系畢業，而係要講你讀d野對你之後的工作有咩用。例如你讀中英文系就最易講，就係你語言能力好，表達能力好，對日後EO既工作好有幫助。又例如你係讀政政的，對政府架構、公共行政都有了解，對日後工作又係好有幫助。至於其他學系，你就要諗下點樣吹，真係冇野吹，你都可以吹下你讀個科對於自己個思維同埋性格有咩好處。例如，你諗野會唔會更小心、細心，更多角度？更有批判性思維？其實呢d野任你吹，只要合理就ok。
之後，如果你有工作經驗的話，就要講出黎。如果你係學生，咁就講下做煙腸時既經驗。太廢太雞的唔洗講。如果你做的野同admin/政府有關的，可以拎出黎講多少少。至於其他工作，就講下，呢d經驗點樣可以令你成為一個suitable candidate.
當然最後，你亦都要再講講自己點解係一個suitable candidate.
講完之後，CEO就會針對你的報名表同CV問問題。其實同私人市場見工差唔多的HR問題。
例如：
- 我見你之前做過合約工，你既工作內容係咩架？
- 我見你報左幾個唔同grade wor. 有冇得in ？in 左未？ in 成點？佢地問咩問題？
- 我見你有報其他grade wor，如果全部都有offer，你會點樣選擇？為什麼？
- AO同EO分別有什麼強項同弱項？
- 你覺得EO的duties之中有邊項對你黎講最有挑戰性？點解？
- 我見你之前做左幾年XXX，點解唔做？走黎做EO？
- 我見你都讀左master，點解唔再讀上去？
- 我見你有去邊度exchange/做intern wor，做d咩架？學到d咩？有咩得著？
- 黎in之前，你做左d咩準備呀？
- 你個major係咩呀？可唔可以分享下係讀咩架？
- 以不多於三個詞語，說說你的強、弱項。
- 點解想加入政府？
- 你畢業之後有冇咩計劃？
- 俾一個理由佢要請你
- 點解一年冇返工？
關於自己份報名表同埋申請表的問題，你最好諗定好d/圓滑少少的答案。如果唔係，你答到口窒窒，呀CEO就知你準備得唔夠。
二、情境題
呢part素來係叫做最重要的一 part。因為呢part係考驗你成為EO的能力。
去到呢一度，你首先要知既係做左EO之後你有咩野要做。咁到底EO有d咩野日常工作呢？
行政主任是專業管理人員，特別擅長資源和系統管理。他們會被調派到各個決策局或政府部門工作，肩負多類職務，也有機會與不同背景和專長的人士共事。行政主任提供廣泛的行政支援，主要包括人力資源管理、部門行政、一般行政支援、地區行政及委員會和議會支援服務、行政和政策支援、計劃管理、規管職責和投訴管理、財政資源管理、活動統籌、以及系統／項目規劃與發展。
Executive Officers are professional managers who specialise in resource and system management. Posted around different policy bureaux and government departments, they enjoy a wide variety of work and have the opportunity to work with people of different backgrounds. They are mainly deployed to provide support in a wide range of executive functions including human resource management, departmental administration, general administration support, district administration and support to boards and councils, executive and policy support, scheme administration, regulatory functions and complaints management, financial resource management, event management, and system / project planning and development.
以上highlight左紅色的中英文你都要背一背，如果唔係你就真係一舊雲去就明年請早。
常見的問題包括：(例如Relocation of Office, Staff work performance, Procurement Exercise with limited budget )
- 你收到各式各樣的投訴，你會點處理？投訴可以係包括你下屬的問題、你部門的工作等。
如果而家要你搞一個酒會，你會有咩野要準備？（過往EO題目分享，摘自政府宣傳片）
- 上頭而家要cut 資源，要你精簡架構但要同時符合KPI，你點做？
- 你點樣去調節/管理下屬/不同的隊伍?
- 你點樣去調節/管理下屬/不同的隊伍?
- 下屬缺勤/誠信的問題
- 個客投訴，而且死都唔走，死都要見你老細，應該點搞？
- 點樣應付工作唔積極既下屬？
- 你既辦公室爲市民提供櫃檯服務。有一次，一個家長帶同細路嚟辦理事務，等候期間，嗰名細路唔聽話嘈住曬。你既一名下屬嘗試交涉，但反而激怒細路既家長，你作爲負責人，如何解決？
- 新office要返9am-8pm 你有5名手下 你會點分配？仲有個大肚婆話唔想返，你點樣處理？
如果而家要你搞一個酒會，你會有咩野要準備？（過往EO題目分享，摘自政府宣傳片）
如果而家部門要換office，你會點樣去準備？（過往EO題目分享，摘自政府宣傳片）
其實要知情境題問咩野，唔洗比錢買試題，只要想像自己係EO，工作時會面對咩實際的問題，就大致上知佢想問咩。你點樣順從老細旨意之餘，又令下屬信服，更令市民觀感良好，這樣都是你要考慮的點。
SEO追問你，唔代表你答得差。相反，佢可以係對你好有興趣。
三、時事題
其實都係跟topic的，會有追問。例如：
講下而家香港點樣處理垃圾。之後就追問，你覺得而家咁多個堆填區飽和之後，可以點算？你要熟政策，如果唔係比人問多兩問就露底了。
其他面試問題舉隅：
你點睇$4000關愛共享計劃？
其他面試問題舉隅：
你點睇$4000關愛共享計劃？
政府研究推出劏房租務管制，你有咩睇法？
關於明日大嶼，你有咩睇法？
關於政府防疫措施，你有咩睇法？
你點睇派$10000的政策？
之後亦會問你知唔知某個政府department係咩局管的。例如選舉事務處係由政制及內地事務局管的。咁佢個局長係邊個呀？
亦有可能會問你：你平時有冇用過d政府服務呀？咁例如考車牌、借還書、book場打波、投票之類你都可以講。
這一部分其實同AO的面試有一定相似的地方，所以可以參考AO會問的時事題：https://cuhkinfo.blogspot.com/2019/02/ao.html
